Mga butanding, kinagiliwan ng mga taga-Ormoc
August 31, 2013 10:12pm
Tuwang-tuwa ang mga residente sa Ormoc city nang nakita ng mga butanding o whale shark na napadpad sa kanilang karagatan.
Sa tala ng Bantay-dagat sa lugar, taong 2011 nang unang makita sa karagatan ng Ormoc ang dambuhalang isda. Mula noon ay inaasahan na ang pagbisita ng mga naturang uri ng isda tuwing buwan ng Agosto.
Nasa 500 meters lang ang layo ng mga dambuhalang isda sa baybayin ng Brgy. Linao at Brgy. Naunagan. Nang una ay inakala ng mga mangingisda na isa lang ang butanding, pero kinalaunan ay nakita na rin ang apat pa nitong kasama, na kinabibilangan ng tatlong maliliit.
Kasama ang mga tauhan ng Bantay-dagat ang mga miyembro ng Philippine Army na nagpaalala sa publiko na huwag sasaktan ang mga butanding.
Inaasahan na mananatili ang mga butanding sa karagatan ng Ormoc hanggang sa susunod na buwan.
Umaasa naman ang mga residente na magtuloy-tuloy ang pagpunta sa kanila ng butanding para maging atraksyon sa mga turista. -- Ronnie Roa/FRJ, GMA News
http://www.gmanetwork.com/news/story/324477/ulatfilipino/balitangpinoy/mga-butanding-kinagiliwan-ng-mga-taga-ormoc